Ina scola per tuts

Las scolas dalla vischnaunca da Breil han la finamira da porscher ina scolaziun cumpleta en vischnaunca. Quei vul dir che mintga affon duei vegnir promovius sin tut ils scalems dalla scola populara tenor ses basegns. Las scolaras ed ils scolars vegnan instrui en las duas casas da scola da Breil e Danis.

Casa da scola Breil

  • scoletta
  • scola primara: 1. – 4. classa

Casa da scola Danis

  • scoletta
  • scola primara: 5. – 6. classa
  • scola superiura

Scoletta

La scoletta da Breil sesanfla el plaunterren dalla scola e stat a disposiziun als scolarets da Breil-vitg. Omisduas annadas ensemen dumbran 11 affons. Ils 6 scolarets da Danis-Tavanasa e Dardin visetan la scoletta a Danis. Ella sesanfla en casa da scola veglia ed ei fetg spaziusa. Las duas annadas vegnan mintgamai instruidas da cuminonza ellas duas scolettas.

Scola primara

La scola primara vegn menada en sis partiziuns da mintgamai ina classa. Las empremas quater classas che vegnan instruidas a Breil dumbran 47 scolars. Da quels habiteschan 20 affons els vischinadis da Danis-Tavanasa e Dardin. Il viadi a scola fan els cul bus da scola. In viadi cuoza 12 minutas. Ils 26 scolars dalla 5avla e 6avla classa van a Danis a scola.

Scola superiura

Ils 40 scolars dalla scola superiura van tuts a Danis a scola. L’instrucziun succeda tenor il model d’instrucziun B. Ferton ch’ils lungatgs, la matematica vegnan instrui allas singulas classas secundaras e realas separadamein, vegnan ils roms musics mintgamai instrui all’entira classa. Cun quater pensums cumpleins eis ei pusseivel da porscher in ault grad dad individualisaziun.

Mesiras dalla pedagogia speciala

Scolaras e scolars cun basegns specials da promoziun vegnan promovi a moda integrativa. La promoziun integrativa cumpeglia la promoziun sco prevenziun, la promoziun senza adattaziun dallas finamiras e la promoziun cun adattaziun dallas finamiras. La finamira ei che la pedagoga curativa sappi  sustener e promover mintga scolara e mintga scolar individualmein. Aschia han era quels affons la pusseivladad da contonscher buns resultats e cheutras rinforzar la confidonza en sesez. 

Ina scola per tuts vul dir ch’era affons che san buca frequentar ina classa regulara duein ton sco pusseivel vegnir integrai ellas scolas da vischnaunca, tut tenor las pusseivladads e habilitads dils pertuccai. En stretg contact cun il Center da cumpetenza Casa Depuoz Trun, ha la scola fatg bunas experientschas en quei grau. 

Catechesa

L’instrucziun religiusa vegn purschida dalla pleiv da vischnaunca e vegn dada tenor il plan d’instrucziun ecumen. Las lecziuns ein integradas egl urari. Affons d’autras religiuns san era separticipar all’instrucziun sche quei vegn giavischau.

Sustegn per scolars cun lungatg jester

Adina puspei vegn la scola confruntada cun scolars che derivan dad autras tiaras e culturas. Per integrar quels affons schi spert sco pusseivel el menaschi da scola regulau, retscheivan els instrucziun da romontsch speciala. Quella vegn adattada allas habilitads dil scolar pertuccau. 

Terapias

Affons che drovan sustegn en logopedia (= problems linguistics) retscheivan instrucziun speciala tier terapeutas e terapeuts dil fatg. Per regla vegnan quellas terapias purschidas el liug duront il temps da scola.