Taglias

Taglias

UFFECI DA TAGLIA

Uffeci da taglia Breil
Via Principala 32
Caum postal 61
7165 Breil

Daria Caduff
Tel: 081 941 11 55 / 56
Fax: 081 941 26 66
Mail: d.caduff@breil.ch


Taglia sin entradas e facultad

Declaronza da taglia

Il termin d'inoltraziun dalla declaronza da taglia per pagataglias primars (habitontas e habitonts) ei mintgamai fixaus sin ils 31-03.

La declaronza da taglia ei d'inoltrar directamein agl uffeci da taglia cantunal a Cuera:

Kantonale Steuerverwaltung GR
Verarbeitungszentrum 1/KO
Steinbruchstrasse 18
7001 Chur

Per ils pagataglias secundars (cun possess da schischom) ei il termin fixaus sin ils 30-09. Tal termin ei era valeivels per persunas sursesez (persunas independentas) sco era per ils purs.
Era lezzas declaronzas ein d'inoltrar directamein agl uffeci da taglia cantunal a Cuera!


Prolungaziun dil termin d'inoltraziun dalla declaronza da taglia

La damonda per prolungaziun dil termin d'inoltraziun sto cuntener las suandontas indicaziuns:
- Numera da register cumpletta incl. numera dalla vischnaunca: 518
- Num, prenum
- Vischnaunca

Damondas da prolungaziun dil termin d'inoltraziun dalla declaronza da taglia ein da tschentar mintgamai avon la curdada dil termin fixau sco suonda:

Online:   www.stv.gr.ch
E-Mail:   fristgesuche@stv.gr.ch

ni a scret alla suandonta adressa:

Kantonale Steuerverwaltung GR
Fristgesuche/KO
Steinbruchstrasse 18
7001 Chur
Tel. 081 257 34 93


Quen da taglia

La taglia communala vegn tschentada en quen mintgamai il schaner digl onn suenter sin fundament dils facturs da taglia dalla perioda precedenta. Ils termins da pagament ein fixai sco suonda: emprema rata entochen ils 31-05 / la secunda rata entochen ils 31-07 / ni igl entir importo entochen ils 30-06. Per pagaments retardai vegn engravegiau in tscheins da retard da 4%. Ei vegn prestau negin tscheins da bonificaziun per restituziuns da taglia.


Pei da taglia

Taglia communala 100% dalla taglia cantunala vertenta

Taglia sin schischom 1,7‰

Taglia sin midada da maun 2%

Taglia da baselgia catolica 15%

Taglia da baselgia evangelica 17%

Taglia da baselgia evangelica cantunala 3,5%


Sorts da taglia

La vischnaunca da Breil pretenda las suandontas taglias tenor las ordinaziuns dalla lescha sur dallas taglias communalas e da baselgia (GKStG):

Taglia sin gudogn ord vendita dil schischom (art. 6)

La disposiziun sco era il quen per la taglia sin gudogn ord vendita dil schischom vegn tschentada era per la vischnaunca entras l'administraziun da taglia cantunala, partiziun taglias specialas. Il cantun quenta giu directamein la part communala cun la vischnaunca da Breil.

Il pei maximal dalla taglia munta tier cantun e vischnaunca mintgamai 15%. Tier venditas da schischom suenter 11 onns possess sereducescha la taglia per mintga onn per mintgamai 1,5% sigl importo da taglia, denton vegn la reducziun maximala da 51% contonschida suenter 44 onns possess. La svaletaziun dil daner ed investiziuns pusseivlas ein medemamein facturs, che san haver influenza sigl importo da taglia.

Taglia sin midada da maun (art. 7 e suandonts)

Tier las midadas da maun da schischom sin territori da vischnaunca ei da prestar la taglia sin midada da maun sin la valeta da marcau. Actual ei il pei da taglia sin 2%.

Taglia sin schischom (art. 16 e suandonts)

La taglia sin schischom vegn taxada annualmein cun ils 31-12 (di da tagl) per igl entir schischom. Il pei da taglia vegn annualmein fixaus dils habitonts alla radunonza communala.

Taglia sin la quota d'ierta e taglia sin schenghetg (art. 21)

Las taglias vegnan taxadas sco suonda:

- per il tschep dils geniturs 5%
- per il tschep da tat e tatta 10%
- per las ulteriuras persunas benefiziadas 25%

Conjugals, partenarias e partenaris registrai sco era vegnetsuenter en lingia directa ein deliberai dalla taglia tier cantun e vischnaunca. Figliasters ed affons confidai vegnan tractai sco ils vegnentsuenter en lingia directa.

Taxas da hosps e da turissem (Art. 23)

Naven dils 01 da schaner 2015 va la nova lescha da taxas da hosps e da turissem per la Surselva miez en vigur. Las habitontas ed ils habitonts dallas 7 vischnauncas da Breil, Vuorz, Andiast, Glion, Sursaisse, Mundaun e Lumnezia han approbau las nova lescha da taxas. La nova lescha remplazza aschia la lescha vertenta ord igl onn 2003 da taxas da cura e promoziun da turissem cun la fin digl onn 2014.

Las tariffas naven dils 01-01-2015 anfleis cheu: taxas da hosps e taxas turisticas


Taglia da tgauns

Per mintga tgaun in territori dalla vischnaunca da Breil ei da prestar annualmein la taglia da tgauns. Per igl emprem tgaun munta la taglia a frs. 75.-, per mintga ulteriur tgaun el medem tenercasa ei da prestar ina taglia da frs. 150.-. Suandonts tgauns ei deliberai dalla taglia da tgauns: tgaun da policia, tgaun da lavinas, tgaun per tschoccs e suords.


Taglia alla fontauna

Naven dils 01-01-2014 ei la taglia alla fontauna da quintar giu sco era da pagar directamein culla administraziun da taglia cantunala, partiziun taglia alla fontauna. Ord il muossavia dalla taglia alla fontauna ein ils differents tarifs da taglia e termins da quintaziun sco era exempels vesibels.

Ulteriuras informaziuns tier la taglia alla fontauna porscha a vus l'administraziun da taglia cantunala, partiziun taglia alla fontauna, sut la numera da telefon 081 257 34 45.


Leschas da taglia ed ulteriurs links

Lescha da taglia dalla vischnaunca da Breil

Lescha sur dallas taxas da hosps e da turissem (01-01-2015)

Disposiziuns executivas tier la lescha sur dallas taxas da hosps e da turissem (01-01-2015)

Lescha sur dallas taglias communalas e da baselgia (GKStG)

Administraziun da taglia cantunala www.stv.gr.ch